Leitin að John Kourafas

English version below!

Upphafið á þessu öllu saman

Þegar ég var ung þurfti ég að sætta mig við það að alast upp án þess að hafa ömmu og afa í lífi mínu. Ingólfur, pabbi mömmu minnar og Ása, mamma hans pabba voru bæði látin þegar ég fæddist. Regína amma dó þegar ég var ný orðin þriggja ára og fékk ég því lítið að kynnast henni.

Þegar ég og Regína systir urðum eldri fórum við að forvitnast um hinn afa okkar, í pabba ætt. Við vissum lítið annað um hann en að hann héti John Kourafas og hafi búið hér á Íslandi árin áður en pabbi fæddist og starfaði hjá Bandaríska hernum. John og Ása amma voru saman þau ár sem hann bjó á Íslandi og talaði hún ekki mikið um hann meðan hún var á lífi. Við vissum að hann væri af grískum ættum og hefði verið á Íslandi þangað til 1956/1957 því pabbi fæddist árið 1957.

Þar sem ég og Regína vorum forvitnar ungar stelpur þá sættum við okkur ekki við það að vita ekkert um afa okkar og mögulega fjölskyldu sem við ættum einhvers staðar úti í heimi. Árið 2010 fórum við því að Googla nafnið hans og reyna að finna hvar hann gæti verið staðsettur. Þessi leit skilaði litlum árangri þar sem það var ekki alveg jafn auðvelt að finna fólk á þessum tíma. Við gáfumst því upp á að leita að afa okkar og settum þetta alveg á hilluna.

Regína systir er mjög ákveðin manneskja og hún hefur reglulega talað um það hvað hana langaði að vita meira um hvað varð um hann John og hvort hann væri enn á lífi. Okkur fannst það ólíklegt þar sem hann væri þá um 90 ára gamall í dag en við vildum ekki útiloka að hann ætti þá allavega einhverja ættingja á lífi. Regína samdi rosalega flott bréf þar sem hún sagði frá John Kourafas (afa okkar) og ömmu okkar Ásu. Hún sagði allt sem við vissum um hann og hvenær hann hefði verið á Íslandi. Bréfið sendi hún á nokkuð marga aðila á Facebook sem voru með eftirnafnið Kourafas í nóvember 2018 og ég viðurkenni að ég var ekkert rosalega bjartsýn að við fengjum nokkurn tímann svar við þessu bréfi.

Nokkrar vikur liðu og þá fær Regína allt í einu svar frá einum sem heitir Chris Kourafas sem sagðist geta hjálpað okkur. Hann þekkti ekki persónulega John Kourafas en hann vissi að pabbi hans hefði átt frænda sem héti John Kourafas sem hefði þjónað Bandaríska hernum á Íslandi. Hann sagði okkur strax frá því að John Kourafas væri ekki á lífi en það gæti verið að hann ætti einhverja nána ættingja á lífi. Chris var svo vinalegur að sökkva sér algjörlega ofan í þessi mál, hann bauðst strax til að kíkja í heimsókn til pabba síns og spyrja hann út í allt sem hann vissi. Pabbi Chris var mjög hissa þegar hann frétti af því að þau ættu ættingja á Íslandi þar sem hann hafði ekki heyrt af því áður. Hann sagði Chris frá því að eftir að John fór frá Íslandi var hann sendur, ásamt bróður sínum, til Grænlands og síðan til Víetnam með hernum. Fljótlega eftir að þeir komu aftur heim til Boston dóu þeir báðir úr krabbameini 1965, þegar pabbi var aðeins átta ára gamall. Við fengum þær upplýsingar að John hafi verið giftur og átt tvær dætur, Kathleen (Kathy) og Susan Kourafas. Þær voru báðar fæddar áður en pabbi fæddist og er ein þeirra á lífi í dag, Kathy. John átti tvo bræður og fjórar systur en ekkert þeirra er á lífi.

Þar sem þessi ætt er frekar stór þá þekkti Chris frændi ekki dóttur hans John sem var á lífi, Kathy. Það vildi þó svo til að systurdóttir hans John, ásamt annarri konu sem var einnig náskyld John voru að koma í heimsókn til Boston á þessum tíma og bauðst Chris til að hitta þær og reyna að fá upplýsingar um Kathy svo við gætum haft samband við þessa hálfsystur hans pabba.

Viðbrögðin við stóru fréttunum

Við vorum mjög stressuð hérna heima meðan við biðum eftir að heyra hvað hefði komið út úr þessum hitting þeirra. Við vorum stressuð yfir því að viðbrögðin yrðu ekki góð og þær myndu loka á okkur. Viðbrögðin voru hins vegar allt önnur, það var mikill spenningur þeirra megin og þær vildu gera allt til að koma pabba í samband við Kathy (hálfsystur hans)! Þær fóru strax í það verkefni að reyna að hafa samband við Kathy til að láta hana vita af fréttunum.

Nokkrum dögum seinna hringir síminn hjá pabba og það var Kathy. Hún var svo ótrúlega ánægð að heyra að hún ætti bróður á Íslandi og langaði að fá að kynnast honum og fjölskyldunni hans. Ég get ekki lýst því hvað við vorum ánægð að sjá hvernig hún brást við öllu saman þar sem við vissum alls ekki hvernig hún tæki í þessar fréttir. Kathy hefur verið í sambandi við okkur fjölskylduna síðan þá og bókaði hún fljótlega ferð til Íslands til að heimsækja okkur. Hún kom til landsins 9 júlí og var í heimsókn hjá okkur í tíu daga.

Það er erfitt að lýsa því hversu yndislegt það var að fá loksins að hitta hana og heyra sögur af fjölskyldunni sem við eigum úti í Boston og Flórida. Við ferðuðumst með hana um Ísland og sýndum henni staði þessa klassísku staði; Geysi, Þingvelli og Bláa lónið. Við kíktum líka með hana á Suðurnesin þar sem við skoðuðum Reykjanesvita, flekamótin, Brimketil og Ásbrú (þar sem pabbi hennar bjó þegar hann var á Íslandi). Hún var alveg heilluð af Íslandi og náttúrunni hérna. Við náðum að kynnast Kathy helling á þessum stutta tíma sem hún var hérna þar sem hún er mjög opin og hress kona. Það magnaða við þetta allt saman var að okkur fannst eins og við hefðum þekkt hana alla ævi, ekki eins og við værum að hitta hana í fyrsta skipti.

Kathy er alveg yndisleg manneskja og hlakka ég til að fá að kynnast henni ennþá betur og rækta sambandið við fjölskyldu okkar í Bandaríkjunum. Kathy fór heim í morgun, 18 júlí, og ég finn það að ég er strax farin að sakna hennar. Það erfiðasta er að það er ekki hægt að hoppa bara upp í bíl og kíkja í heimsókn til þeirra auðveldlega. Við þurfum því að skipuleggja ferð saman til Flórída og kíkja í heimsókn sem fyrst! Við erum svo þakklát fyrir alla hjálpina sem við fengum í leitinni að ættingjum okkar og vera loksins komin með þau öll í lífið okkar.

Þangað til næst!
Ása Hulda