Um helgina lauk ég fjallgöngunámskeiði fyrir byrjendur sem mig langar að segja ykkur aðeins frá. Ég ákvað að skrá mig á byrjendanámskeið, þó ég hafi nú alveg farið í nokkrar fjallgöngur áður, af því að mig langaði til að læra meira um búnað, göngutækni, læra nýjar gönguleiðir og til þess að vinna aðeins í lofthræðslunni minni, sem stoppar mig ansi oft af í fjallgöngum.
Við fórum upp á nokkur fell og fjöll á námskeiðinu, meðal annars Úlfarsfell, Mosfell, Helgafell, Kerhólakamb og Móskarðshnjúka. Síðasta daginn tókum við svo göngu um Seltún í Krýsuvík. Fyrstu þrjár göngurnar fengum við grenjandi rigningu og síðustu tvær fengum við brjálað rok og snjó/hálku og myrkur. Svo þetta var ansi krefjandi og maður lærði mjög mikið á því að fara í göngur í svona allskonar veðrum og vindum. Ég þurfti að fara mikið út fyrir þægindarammann minn á tíðum og sigrast á sjálfri mér, sem gerir manni ekkert nema gott, þó það sé kannski rosalega erfitt rétt á meðan. En því oftar sem maður gerir það, ögrar sjálfum sér svona, þá kemur að því að maður vinnur á hræðslunni og á endanum kemst maður jafnvel yfir hana. Ég mæli svo ótrúlega mikið með að fara á svona námskeið, gönguhóp eða skipulagðar gönguferðir með leiðsögu fólki þegar maður er að fara af stað í svona fjallgöngum, maður lærir svo mikið af því. Þá þarf maður líka ekki að finna gönguleiðirnar sjálfur plús auka öryggið sem fylgir því að vera í hóp. Það eru til ótrúlega margir hópar hér á Íslandi sem eru að bjóða uppá göngur allan ársins hring, svo það ætti enginn að vera í vandræðum með að finna slíkt. Ég á klárlega eftir að fara í fleiri svona göngur í framtíðinni.
Takk fyrir að lesa
